cerpen betawi kudu maju

BETAWI KUDU MAJU

olehSuezyanto Wiryoatmodjopada 19 Mei 2010 jam 11:14

Abis markir terus ngunci stang ojeknye, Bang Tatang langsung ke tempat duduk di warung gado-gado Mpok Selfi.

“Salam lekom Mpok, apekabar?” kate Bang Tatang ngucap salam.
“Walekom salam“, sahut Mpok Selfi ramah, “Baek-baek aje Bang, mau ngopi dulu ape langsung dibikinin gado-gado?” sambung Mpok Selfi.

“Yah, masih pagi pok, baru juge jem sembilan, aye minte kopi aje deh pok. Gado-gadonye entar siang aje.”

“Dari mane Bang, maksud aye abis nganter penumpang kemane, gitu?”

“Tadi aye nganter orang ke Maruga,….. duileh pok!....., disono ade bangunan perumahan baru, bener-bener kawasan kite nih bakal tambah rame. Itu pok nyang bikin aye demen tuh, harge tanahnye aye denger udah naek due kali lipet.”

“Ih… Bang Tatang………., kalo udah ngomong tanah aje, ‘idungnye…… mekar’ dah.”

“Lah…. Mpok, dimane-mane kalo orang Betawi…. Ape lagi ngojek, kagak jauh dah dari urusan jual-beli tanah. Penghasilan ojek kagak seberape, nyang penting sabetannye pok…. Kaye nggak tau aje.”
“Ye…iye.. Bang, aye ngerti. Cuman begini Bang, nyang aye kuatirin tuh, kalo urusan bisnis tanah di kawasan kite jangan sampe kaye di Meruya Udik. Gara-gara status tanah kagak jelas, nyang rugi pembeli. Kan kesian Bang, udeh jauh-jauh merantau dari daerah…….., kerje siang-malem……, ngumpulin duit…., giliran duitnye ngumpul beli tanah ame rumah, eeh… tau-tau mau dieksekusi.”
“Soal itu sih, insya Allah deh pok, biar aye susah jangan sampe dah bikin susah orang laen. Kite nih pok kalo boleh dibilang dari sononye udeh ketiban dose.”

“Maksud Abang ketiban dose apaan? Dose nyang begimane Bang, cobe terangin aye mau tau.”
“Cobe kite renungin pok, orang-orang tue kite dulu cukup puas kalo anaknye bise ngaji, bise beribadah nyang bener.”

“Bise ngaji, ibadah nyang bener itu kan bagus Bang, kok masih dibilang dose…, dose macem ape lagi Bang?”
“Permisi Bu,” mendadak tau-tau ade pengamen udah di depan warung, bikin obrolan jadi keselak. Petikan gitar ame lagu nyang dinyanyiin cocok ame nyang lagi diobrolin, dari judul ampe liriknya begitu nyentuh rase kebetawian.

BETAWI KUDU MAJU

Dari zaman ke zamanjadi korban penggusuran
Selalu ketinggalan nggak peduli perubahan

Dari Sunde Kelape ke zaman perjuangan
Sampe kemerdekaan Betawi punye peranan





Ref:

Zaman Ali Sadikin mulai ade perubahan
Kite punye kebanggaan Betawi Metropolitan
Orang-orang berdatengan, mencari peruntungan
Ngumpulin kekayaan…, Betawi nggak kebagian...!

Betawi kudu maju……., kudu menuntut ilmu
Peduli pendidikan, jangan ampe ketinggalan
Ini zaman kemajuan……

Abis nyerahin selembar duitke pengamen, Bang Tatang lanjutin lagi obrolannye.

“Mpok Selfi…., lagu ciptaan Haji Suez tadi bener-bener pas ame keadaan kite, ape lagi kalo denger pertanyaan tetangge aye Si Mamad, jadi sedih….. Aye sedih lantaran die nanya ‘kenape sih orang-orang pendateng pade bise kerje di kantoran? Orang-orang kite kagak bise kerja di kantor?’…. Disini pok, awal perenungan aye…., terus terang pok… aye kagak pengen tujuh turunan anak-anak aye jadi tukang ojek.”

“Iye….ye…, aye juga kagak mau Si Rodiyeh tujuh turunan jualan gado-gado.”

“Nah! Sekarang Mpok udah paham, berarti ngaji ame ibadah belon cukup kan? Orang kudu sadar die idup di dunie, tempat nyari bekal ke akherat, tiap zaman tantangannye nggak same. Jangan sampe nyusahin anak cucu….., kite kudu mikirin bekal ilmu buat anak-anak kite, bekalin pendidikan nyang cukup. Supaye masa depannye jangan kaye aye. Pagi ngojek…., siang ngojek…., kalo perlu malem ngojek!”

“Alhamdulille aye makin paham Bang, aye yakin kalo ade kemauan pasti Tuhan ngasih kite jalan. Berarti orang-orang tue kite kagak ngerti, kagak ngerti care nyiapin mase depan anaknye.”

“Sebenernye sih nyiapin buat mase depan anak, buktinye kite kebagian warisan kebon, sawah biar nggak gede. Tapi namenye warisan tanah, kebon ame sawah, kalo dibagi-bagi lame-lame juge abis, betul nggak pok. Biar begimane masih punye harepan bise nyiapin mase depan keturunan kite masing-masing. Aye ikhlas dunie akherat, demi Allah ame Rasulullah…. Biar seumur idup jadi tukang ojek, nggak ape. Nyang penting jangan sampe anak keturunan aye ngojek.”

“Begitu juge aye Bang, bukannye kite nggak bersyukur ame rejeki nyang kite terime. Nggak ade salahnye kan Bang kalo mau lebih maju dari sekarang. Aye kepengen Si Rodiyeh jadi perempuan Betawi nyang punye pendidikan tinggi di kampung kite, bise kerje di kantoran.”

“Insya Allah mpok…., udeh ye… pok, udeh siang aye mau ngojek dulu, nanti kite sambung lagi……, nih pok duitnye buat bayar kopi segelas, combronye tige, salam lekom….”

“Walekom salaam wa rohmatullahi wa barokatuh, kembaliannye nih Bang Tatang.”
“Gampang deh pok, entar aje…. Entar siang aye kesini lagi.”

Bung Suez, pencinta Betawi.